五天精華遊

五天上班，係香港打工仔既夢想，雖然感覺好似睇住遲過人地三十幾年先升空既神六咁，感情既複雜，又興奮。唔岩，身為國際大都會，係呢方面比大陸仲要落後，應該在複雜的感情上加上一點羞愧。以後再聽阿芝主持既五天精華遊，應該不會再有「其實係五天半精華遊」既感慨，聽到阿芝大嗌「HAPPY FRIDAY!」既時候，不會再酸溜溜了吧？

有睇開我寫野既朋友（應該唔係好多）應該知道我一向都係在心中反對僱主剝削大聯盟既中堅分子，對於曾師兄既「福為民開」，深深感恩，但是直到五天半魔咒真正得到解放前，我們只可以望住已經解放既同胞流晒口水，得個恨字。甚至悲觀一點，如果一天不勒令全民解放，我地老闆應該絕對不會良心發現而皇恩大赦吧！

因此，既然福已為民開，佛應送到西，半吊子的政策會激化香港既深層矛盾呢！所以我全力支持曾師兄以強政勵治全面強制推行五天上班，分餅仔之餘又可以以此出招堵住大大聲提「最高工時，最低工資」既議員同埋工會之口，籠絡打工仔人心，好一招一石多鳥的計謀啊！學鄧伯伯話齋：黑貓白貓，抓到老鼠的就是好貓。忠曾奸曾，推行五天上班的就是好曾！不過，千祈唔好學推行全面禁煙咁虎頭蛇尾就得喇！