唔知點解忽然想買車，呢幾日都不斷睇有關車既野，其實一路都問自己係咪有咁既需要呢？講真又唔係囉，身邊有車既朋友都勸我三思，一闊三大，車價、驗車、整／改、燕梳、牌費、油錢、消耗品、車位，樣樣都係錢，一個月大大話話洗多三千蚊，聽落都肉赤，如果唔係搵到個朋友夾份出車，真係點都唔會考慮架，兩個人分，就好好多既。之不過隨之而來既問題就係泊位喇，由於我地住得唔算近，又想要平車位，所以呢個問題到依家都未解決得到，解決唔到既話就冇可能買喇，煩死。講真車唔係必須，不過對於我黎講，作用係俾我可以有機會真正練下手車，如果唔係都唔知個牌考番黎做咩，另外虛榮心，滿足自己，多一樣生活寄託都係原因，心靈上的空洞用物質填補，盡人事吧。
我係一個汽車白痴，淨係識開郁架車，其他你問我我都唔知問邊個，所以揀車一切從外表開始，可憐我地實在係窮苦大眾裡面既中堅份子，預算極為有限，揀起來既時候都抓破頭皮，HONDA車我朋友屋企已經有一架EK3，所以對於EG系列當然不感興趣，TOYOTA為另一個重點目標品牌，AE111係靚仔到爆，不過跑車燕梳貴，而且食油，AE110同埋COROLLA個款實在不堪入目，跟手數到三菱，起初都被VR系列吸引到，不過左度右度2000CC始終食油，最後終於搵到LANCER MX，各方面既考慮都顧及到，只嫌車頭唔夠靚仔，找一架改左或之後自己再改應該可以解決此問題，雖然三菱有人話問題多，不過比起買萬事得，我寧願搏一下好過。依家型號基本鎖定，要努力解決泊車問題了，兩個人住又唔近又要一齊買車好似好戇居，好似好浪費，好似不設實際，但係唔考慮咁多既話，我只係想擁有一架車，靚靚仔仔既，揸出街係開心既，僅此而已。明符其實用錢買開心！
請先 登入 以發表留言。