八月十九日（出發日）
某同事身體不適臨陣退縮，然後同事Ｅ在一小時內找來友人Ｊ補上，並即時出旺角陪她買泳衣及裝備，最弔詭的是友人Ｊ身上竟然有帶「回鄉証」！下班時間一點，兩點半準時在碼頭集合，「真係平時做野又唔見咁有效率．．．．．．」
是次旅行團：豬海馬交兩天豪華團（簡稱豬馬豪華團）
導遊／阿公：同事Ｈ
團友：同事Ａ、Ｃ、Ｄ、Ｅ、Ｔ，友人Ｊ
旅行團第一站先到酒店落腳，住豬海銀都酒店（五星級！），咪先，的士大佬一上車就用半鹹淡廣東話向我們說：「現都麻麻地咋，吉利河豚商抹酒店價錢差唔傑，鄧係令巧多獲，現都以前就巧，依家狗勒。」唔係化！一到步就咁講，幸好五星始終係五星，差極都有星，當我們鬼祟地分批上房後，發現房間都算舒適寬敞。（按：你班友八條冷卜兩間房咁大把，都唔係諗住訓架啦！）
重大發現：廁所內其中兩件新奇的「貼心用品」（需付款）
Ａ．隱形安全套 評語：勁呀
Ｂ．震動安全套 評語：未玩過呀
於酒店安頓完畢後，一行人馬上動身前往夢幻水城，後來發現於六時後入場每人可以少付三十大洋，精打細算豪華團一行人決定省下這筆錢豪飲豪食，於是在六點入場前唯有扮觀光客在水城外閒逛：
同事Ｈ稱：豬海粟米、豬海番薯、夢幻水城為豬海三寶
發現：踢住拖騎摩托既「豬海華ＤＥＥ」
我推測場外一間宮廷按摩：裡面Ｄ小姐係著住肚兜同你按摩既
同事Ｄ發現收到一張假十蚊
終於等到六點，開始玩水玩水玩水：很長的激流河，有一個大浪位同事Ｄ被巨浪拋起至半空（情況似大廚拋鑊）；等到眼訓既水泡滑水梯；又刺激又好玩，俯衝滑板滑水梯（玩左四次）；最驚心動魄，八層樓高前半段接近９０度的高速滑水梯（我作左個名俾佢叫跳樓天梯）。其他不贅，集中講一下玩跳樓天梯的感受。起初計劃行程時我已經對此梯心存敬畏且「不敢褻玩」，現場所見後雖然覺得條梯更加恐怖，但所謂「到了水城不跳樓，便稱好玩也枉然」，再想深一層其實「好快姐！」全程三秒內完事，為了展現我的男子氣慨，抱著必死的覺悟，我毅然和同事一同登上天梯，其間一步一壓力，越行越有，感覺奇高無比。排隊時，還看見有人臨落去的一刻突然縮沙（我見到佢腳都震晒，撞鬼）．．．根據我死過翻生既體驗，玩此梯最恐怖的就是坐上滑台後等待下去的時刻，因為梯的中段太直，眼睛望不見整條滑梯，只望見最底的部分，當我擺好姿勢後，眼睛再也不敢張開，靜靜等待工作人員推我下去，心想：「千祈要貼住條梯，唔好飄出去呀！」（有小小物理常識既人應該明我點解有咁既擔心）然後「刷」一聲，強烈的水阻令我知道滑到底部了，原先以為至少會有跳樓機那種離心力的感覺，可是我錯了，掉下去的一刻快得連感受到離心力的時間也來不及．．．快到丫．．．
（按：有三個好玩項目關門了：一個係螺絲滑道，中間有個窿跌落下面水池，需戴頭盔玩；另一個係浮筏水滑道，好似海盜船咁兩邊滑；吊索，驚既係下面成程好多地方都係硬地．．．）
圖：高空高速滑道（跳樓天梯）與平行滑道（俯衝滑板梯）
雖然沒有想像中的恐怖，可是回想一下整個過程不由得心跳加速啊！最後我們十點鐘離開水城回酒店沖洗，到的士大佬推介的「新海利」食第一餐豪華餐（十二點先食晚飯，晏晝我地淨係食左個老麥咋陰公），食物尚可（二百幾蚊抵到爛）。再之後就到按摩中心按摩到三點，而我比較黑仔，在小姐極唔敬業的情況下我要不斷忍住睡意提醒她不要停手，她講了最少兩次電話，離開左一次房間，打了十個呵欠以上，按完了一點鬆弛的感覺也沒有，不厚道一點的話真想叫人把她換走，這次是我最差的一次按摩經驗。
回到酒店同事Ｃ一句：「我覺得住酒店既感覺好過去ＣＡＭＰ。」引來一輪揶揄。
我：「我都知道去日本好過去南丫島。」
同事Ｅ：「俾錢之嘛，下次搞我地去台灣囉！」
同事Ｈ：「小姐，果Ｄ渡假屋黎架咋。」
原來計劃的瘋狂遊戲及房間「集體」玩樂因為時間太晚的關係一致通過取消。
切切古（待續）
文章標籤
全站熱搜
日本．WH (1)