小城貓事

冇人唔知「波係圓既」，不過以呢一句說話道出足球比賽引人入勝之處，以及當中充滿變數既哲理既人，係伍晃榮。佢係新聞界有幾大貢獻我並唔知道，講得白一點的話，佢入無線時我連毛都未出齊，更遑論「阿盲」時代既佢了。但係對於一個球迷（觀眾）黎講，睇佢報既新聞，唔係報個比數消息咁簡單，風趣幽默既旁白，直頭令到睇佢變左係主要目的，賽果只係其次。曾幾何時，冇得睇波既我地晚晚坐定定等睇新聞，雖然只有短短數分鐘，不過每次都會大呼過癮。

 

自從佢引退後，睇得出度稿人、報導員為左延續佢既風格落左唔少努力，可惜只得其形，未見其神，畢竟老前輩的聲線早已家傳戶曉深入民心，要做到十足十又豈會容易呢？都係陳志雲講得好：「一個時代的終結」，如今要重現或模仿都已經唔可能，未來能否開拓出新的風格或播報新星，就睇呢一代人既努力了。

 

佢既金句的話真係多不勝數，除左「波係圓既」同埋「無線電視記者伍晃榮報導」之外，我最印象深刻既係呢句：

 

「有乜野比送一個大禮更好？咪就係送夠兩個大禮囉．．．」

 

真係笑到標眼水！今日睇報紙，重溫左好多佢既金句，又諗起好多歡樂既時光．．．人長大了，陪伴係身邊既人和事都不斷咁變，此時此刻，除了惋惜，還有唏噓。今日同朋友傾開計，佢提起伍晃榮問「珠珠」想唔想有一個童話式婚禮果段，後尾李臻仲插一腳，又係超歡樂。令我記憶尤新既爆肚仲有佢問李燦榮「你對足球都好熟架，曼聯高ｄ抑或皇馬高ｄ丫？」結果令我知道左李燦榮原來鐘意肥哨兼且唔係「好朋友」，自此睇佢報新聞時都多了一陣敵意（笑）。話說佢同李燦榮兩個都好鍾意講足球野，記得有一次講完西甲又係度討論皇馬保唔保得住個歐冠盃席位，李仲問左句「唔知朗拿度出唔出得返」可憐魏綺珊搭唔到咀呢．．．

 

另一個最令球迷興奮既係，零六世界盃，伍晃榮終於可以同阿叔一齊講波，呢一對夢幻組合，我地真係恨左好耐。記得係佢好謙虛咁講過：「我講波呢，只係波完左先識講架姐。」那一年的世界盃，完了球迷的一個願望，如今佢掛靴了，我地永遠都唔會忘記佢。